Gjatë të martës u riatdhesuan 49 shtetas shqiptarë, mes tyre familje me fëmijë, të cilëve nuk u ishte pranuar kërkesa për azil në vendet e BE.

Personat e riatdhesuar kanë ardhur me një fluturim charter nga Metz dhe Nancy. Nga shtetasit e kthyer, 5 ishin persona që kishin kërkuar azil në Luksemburg ndërsa 44 të tjerë nga Franca.

“Veç bashkëkoordinimit Francë – Belgjikë dhe Francë – Holandë, kësaj radhe kanë marrë pjesë Luksemburgu dhe eskorta e Policisë Kufitare shqiptare. Policia Kufitare në Rinas mori masa për sigurimin e tyre në ambientet e përcaktuara për këtë qëllim, deri në përfundim të procedurave nga specialistët e Policisë Kufitare.

Ministria e Brendshme dhe Policia e Shtetit apelojnë edhe njëherë për të gjithë ata shtetas që synojnë të udhëtojnë në hapësirën SCHENGEN, me qëllim kërkimin e azilit, të mos bëjnë përpjekje të kota, pasi shanset për të fituar azil janë zero”,-thuhet në një njoftim të Policisë së Shtetit./lapsi/