Një person është ekstraduar nga Gjermania drejt Shqipërisë, pasi ishte shpallur në kërkim ndërkombëtar dhe i dënuar me 6 vite burgim nga drejtësia shqiptare.

Në vijim të operacionit ndërkombëtar të koduar “The Wanted”, autoritetet shqiptare finalizuan ekstradimin e shtetasit shqiptar Sokol Ndreka, 51 vjeç. Ai ishte në kërkim, pasi Gjykata e Shkallës së Parë e Juridiksionit të Përgjithshëm Tiranë, në vitin 2024, e kishte dënuar me 6 vite burgim për veprat penale “Ndihma për kalim të paligjshëm të kufijve” dhe “Largimi i të burgosurit nga vendi i qëndrimit”.

Sipas hetimeve, më 31 tetor 2022, në rrugën dytësore Tiranë–Durrës, Policia kishte kapur në një automjet 15 shtetas të huaj, emigrantë të paligjshëm. Nga verifikimet rezultoi se Sokol Ndreka ishte i përfshirë drejtpërdrejt në aktivitetin e paligjshëm të trafikimit të emigrantëve.

Falë bashkëpunimit mes Interpol Tiranës dhe Interpol Wiesbaden në Gjermani, u bë i mundur arrestimi i tij në territorin gjerman dhe më pas ekstradimi drejt Shqipërisë, ku do të vuajë dënimin e dhënë nga drejtësia shqiptare.