Banorët e pallatit 14 në lagjen nr.1  të Kukësit, po jetojnë me frikën e shembjes së godinës katër katëshe, ku më të rrezikuar janë 12 familje.

I ndërtuar  mbi 40 vite  më parë, amortizimi i godinës vihet re në shumë pjesë të saj.

Kabllot elektrike, të cilët në ajër duken si rrjeta merimangash, janë problemi i rradhës për banorët. Pikërisht për këto arsye, familjarët ngrenë alarmin se situata është kritike. Apeli i tyre është për ndërhyrje urgjente.

Banori i pallatit: “Është duke rënë i gjithë savatimi dhe pallati është amortizuar komplet sepse ka shumë vite. Fëmijët që luajnë gjithë ditën këtu i kanë rënë savatimet në kokë. Edhe kabulli i korrentit nëpër dritare  është i zhveshur.”

Ndërsa një tjetër banor është shprehur:  “Lagështia vjen nga depozitat sipër, pasi i gjithë uji bie në tokë dhe ka prishur savatimet. Dhe nuk kemi mundësi ta rregullojmë vetë.”

Një situatë e ngjashme paraqitet edhe në pallatet e tjera në këtë lagje të kukësit. Rënia e suvasë nga fasadat është kthyer në një fenomen të përditshëm duke rrezikuar jetën e  banorëve dhe fëmijëve që luajnë përreth./on/Arbresh.info