Kryeministri i Shqipërisë, Edi Rama, pranoi propozimet e kryetarit të Partisë Demokratike, Lulzim Basha për 7 emrat e rinj të qeverisë së tij dhe i dërgoi për dekretim në Presidencë.

Rama dhe Basha u takuan në mbrëmje në mjediset e Pallatit të Kongreseve dhe përmbyllën një nga pikat e marrëveshjes që ata arritën të enjten në orët e para të mëngjesit, raporton TopChannel.

Emrat teknike të propozuar nga opozita janë: Për postin e zëvendëskryeministrit: Ledina Mandia, ish-Avokate e Shtetit.

Për postin e ministrit të Brendshëm, Dritan Demiraj, gjeneral, ish-komandant i Trupave Speciale dhe ish-pjesëtar i Forcave të Armatosura në misionet jashtë vendit.

Ministre e Financave, Helga Vukaj, drejtoreshë në KLSH dhe ish zv/drejtoreshë e Agjencisë së Kthimit dhe Kompensimit të Pronave.

Ministër i Drejtësisë, Gazmend Bardhi, këshilltar ligjor i Partisë Demokratike.

Ministër i Arsimit dhe Sportit, Mirela Karabino.

Ministër i Shëndetësisë, Arben Beqiri, mjek.

Ministre e Mirëqenies Sociale dhe Rinisël: Xhuljeta Kërtusha.

Po ashtu, Partia Demokratike ka propozuar Klement Zgurin për postin e Kryetarit të Komisionit Qendror të Zgjedhjeve, prej shumë vitesh anëtar i këtij institucioni, ndërsa avokaten Erinda Ballancën për kreun e Avokatit të Popullit.

Nesër do të vihet në zbatim marrëveshja Rama-Basha, do të miratohen ndryshimet në qeveri, paketa për zgjedhjet, Vettingu si dhe kreu i ri i Komisionit Qendror të Zgjedhjeve.

Këta emra shkojnë për dekret. Ndërkohë Presidenti Nishani ka ndryshuar datën e zgjedhjeve. Dekreti i ri zyrtarizon 25 qershorin si datën e dakordësuar mes Kryeministrit dhe liderit të opozitës, ku njëherësh do të mbahen edhe zgjedhjet për kryetarin e ri të Bashkisë së Kavajës.