Ish-ministri i Jashtëm Ditmir Bushati kërkon nga udhëheqja e Serbisë që të marrë përgjegjësi dhe të kërkojë falje për krimet e luftës në Kosovë, që do të ishte një parakusht për një proces normalizimi e pajtimi mes shqiptarëve dhe serbëve.

Deputeti socialist thotë në postimin e tij në Facebook se shpreson që të kenë shërbyer si mësim i hidhur për këdo piruetat me këmbime territoresh, relativizimi dhe amnestimi i përgjegjësisë shtetërore që mban Serbia për krimet e kryera në Kosovë në funksion të mbijetesës politike.

“Unë bëra atë që bëjnë njerëzit kur fjalët dështojnë”, do të shpjegonte 50 vite më parë, Kancelari Gjerman Willy Brandt aktin e tij të rënies në gjunjë para memorialit për viktimat e kryengritjes së getos së Varshavës, të vitit 1943. Një moment simbolik i pranimit dhe ballafaqimit me të vërtetën e Gjermanisë dhe historisë së Evropës pas Luftës së Dytë Botërore.

Dy dekada nga çlirimi i Kosovës dhe përfshirja e të gjitha vendeve të rajonit në procesin e integrimit europian, shtrohet pyetja: Kur do të shohim udhëheqësit e Serbisë të bëjnë të njëjtën gjë për krimet e kryera në Kosovë, si parakusht për një proces normalizimi e pajtimi mes shqiptarëve dhe serbëve?

Piruetat me këmbime territoresh, relativizimi dhe amnestimi i përgjegjësisë shtetërore që mban Serbia për krimet e kryera në Kosovë, në funksion të mbijetesës politike, shpresoj të kenë shërbyer si mësim i hidhur për këdo. Tanimë, nevojitet kurajo dhe përgjegjshmëri për t’u ballafaquar me ketë realitet dhe kurrësesi për t’u përfshirë në revizionimin e historisë” shkruan Bushati./abcnews.al/