Në seancën e sotme të Kuvendit kreu i Grupit Parlamentar të Partisë Socialiste, Taulant Balla foli për rekomandimin pa kushte të një dite më parë nga Komisioni Europian për hapjen e negociatave të anëtarësimit në BE.

Ai tha se pavarësisht përpjekjeve të opozitës rrugore për ta ndaluar këtë proces, në 2019-të Shqipërisë do t’i hapen negociatat me BE.

“Sot është një ditë e gëzuar, nuk duhet ta fshehim. Merita kryesore i takon shqiptarëve, 94% prej tyre mbështesin rrugën e integrimit. Kjo është pikënisja ku mbështetet puna e qeverisë sonë për të përparuar drejt hapave që do na çojnë në BE, ndër to spikat kryereforma në drejtësi.

Verdikti i KE ishte i merituar. Pavarësisht rëndësisë së vendimit të djeshëm, dua shumë të jem i sinqertë me të gjithë ju dhe kolegët e opozitës. Për ne ishte konfirmim dhe pasqyrim real i punës sonë drejt aspiratës për anëtarësim në BE. Koincidence është fakti që publikimi i raportit u la direkt pas zgjedhjeve europiane që tregon se ky proces është edhe politik. Edhe vjet u mor ky vendim, por Këshilli Europian vendosi shtyrjen se vendimmarrja aty është mbi të gjitha politike.

Progres-raporti është i bazuar në fakte, punë të kryera, ndonëse de jure nuk i hapi negociatat siç u rekomandua në qershor. Shqipëria vijoi punën e saj me procesin screening. Ky ishte raporti më i mirë në këto vite. Brenda 2019 Shqipëria do të hapë negociatat po e them pavarësisht opozitës rrugore që shkon në kah të kundërt me interesat e vendit. Në 2019 do jemi të gjithë krenarë që vota e shqiptarëve na ka sjellë këtu. Pavarësisht se opozita u mundua me çdo kusht të minonte rrugën e integrimit të shqiptarëve. Ata s’kanë rreshtuar asnjë ditë të vetme të pengojnë punën e reformës në drejtësi”,- tha Balla./tch