Një tjetër i kërkuar nga drejtësia shqiptare është arrestuar pas një operacioni të përbashkët mes Interpol Tiranës dhe autoriteteve spanjolle.

Në kuadër të operacionit ndërkombëtar “The Wanted”, u ekstradua nga Spanja drejt Shqipërisë 34-vjeçari Juxhin Drazhi, i shpallur në kërkim nga Gjykata e Posaçme Kundër Korrupsionit dhe Krimit të Organizuar.

Ai është vënë nën masën e sigurisë “Arrest në burg” për veprat penale “Trafikimi i narkotikëve” në formën e grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”.

Hetimet e SPAK zbuluan se Drazhi ishte pjesë e një organizate që trafikonte drogë drejt Norvegjisë dhe Belgjikës. Ekstradimi u realizua falë bashkëpunimit të ngushtë mes Interpol Tiranës dhe Interpol Madrid, duke shënuar një sukses tjetër në luftën kundër trafikut ndërkombëtar të narkotikëve.