Lëvizja Atdhetare “Krahët e Shqipes” organizoi një protestë në Sheshin “Skënderbej” për arrestimin e ish-anëtarit të Ushtrisë Çlirimtare të Kosovës Dritan Goxhaj në Tiranë, për llogari të gjykatës speciale.

Pjesëmarrësit në protestë kërkuan lirimin e Goxhajt.

“Është e turpshme, e patolerueshme, një idealist si Dritan Goxhaj të degradohet dhe nga kush? Nga shteti shqiptar”, tha njëri nga protestuesit.

Sipas protestuesve, arrestimi i Goxhajt është i padrejtë dhe cenon fjalën e lirë.

“Në qoftë  se unë dhe Dritani do kishim rënë në luftë ne do ishim dëshmorë, do ishim heronj, ndërsa sot Dritani shkon para drejtësisë për padrejtësinë që po i bëhet. Po synohet të dënohet çështja jonë kombëtare dhe ky është turp, si për opinionin dhe për drejtësinë shqiptare. Vepra e UÇK-së është liria e Kosovës”, theksoi ai.

Dritan Goxhaj u arrestua pak ditë më parë në Tiranë me qëllim ekstradimin në Hagë me akuzën e pengimit dhe frikësimit të personave që kryejnë detyra zyrtare./abcnews.al