Varhelyi: Ditët e ardhshme do të publikohet korniza negociuese për Maqedoninë e Veriut

15:42 | 12 Qershor 2020

“Ditëve të ardhshme do ta publikojmë kornizën negociuese. Ky është hapi i radhës në procesin e negociatave me Maqedoninë e Veriut dhe Shqipërinë, ndërsa shumë shpejt do të fillojmë të punojmë në Këshillin e BE-së, me qëllim që vendet-anëtare ta miratojnë dhe të vazhdojmë me procesin e anëtarësimit”.

Këtë sot e deklaroi eurokomesari për zgjerim Oliver Varhelyi, në panel diskutimin “Anëtarësimi i Ballkanit Perëndimor në BE: Besueshmëri, parashikim dhe udhëheqje politike”, në kuadër të Forumit Ekonomik Delfi, që mbahet përmes video-konferencave nga Athina, përcjell telegrafi maqedoni.

Në panel kanë marrë pjesë edhe kryetari i LSDM-së Zoran Zaev, së bashku me kryeministrin e Shqipërisë Edi Rama, dhe atë të Serbisë Ana Brnabiq, ndërsa përmes një video-mesazhi është drejtuar edhe presidenti serb, Aleksandar Vuçiq.

“Në krahasim me tetorin e kaluar, tani kemi metodologji të re për procesin e zgjerimit dhe kemi arritur të sjellim vendim për nisjen e negociatave me Maqedoninë e Veriut dhe Shqipërinë”, tha Varhelyi, duke shtuar se për Komisionin Evropian, Ballkani Perëndimor është njëri nga prioritetet.

Ai tha se për të ka qenë shumë e rëndësishme fakti që shtetet e Ballkanit janë të përkushtuara për të qenë pjesë e BE-së.

Shpërndaje në rrjete sociale

Lajmet më të lexuara