Shtetet që anëtarësohen në NATO, siç është Maqedonia e Veriut, duhet të kenë një mënyrë të sigurt të komunikimit, tha Sekretari i Përgjithshëm i Aleancës, Jens Stoltenberg në një intervistë për “Zërin e Amerikës”.

“Ekzistojnë standarde që duhet të përmbushen kur bëhet fjalë për infrastrukturën civile dhe telekomunikimit, siç është 5G. Kjo vlen edhe për anëtarët e rinj të ardhshëm, siç është Maqedonia e Veriut. Këto standarde nuk zbatohen për vendet jo anëtare, por ne mund t’i kërkojmë ose t’i këshillojmë ata ta bëjnë këtë”, tha Stoltenberg për ndikimin e mundshëm të forcave të tjera globale në rajon dhe sfidat e sigurisë me të cilat përballet NATO-ja.

Për dallim nga më parë kur kërcënimi më i madh ishte vetëm ish-BRSS, Stoltenberg thotë se kërcënimet tani vijnë nga shumë anë, sulmet kibernetike, anekset,… dhe nuk mund të parashikohen.

“Prandaj është e rëndësishme që NATO të mbetet e përgatitur dhe e shkathët në mënyrë që të mund t’i përgjigjet në mënyrë të duhur çdo krize të re,” tha sekretari i përgjithshëm i Aleancës.