Ministria e Mbrojtjes e Republikës së Maqedonisë i informoi qytetarët se është shpallur konkurs publik për pranimin e 125 ushtarëve profesionistë për shërbim në Armatën e Republikës së Maqedonisë.

Siç kumtoi sot MM, ushtarët e ardhshëm potencial, për t’u bërë pjesë e ARM-së, do të duhet t’i përmbushin kushtet e përgjithshme dhe të posaçme të cekura në konkursin publik.

“Ministria e Mbrojtjes u bë thirrje të gjithë qytetarëve jo më të vjetër se 25 vjeç deri në ditën e përfundimit të konkursit, të cilët dëshirojnë të kontribuojnë për sigurinë dhe mbrojtjen e integritetit territorial dhe sovranitetit të Republikës së Maqedonisë ta shfrytëzojnë mundësinë dhe të jenë pjesë e Armatës së Republikës së Maqedonisë”, ceket në kumtesën e MM-së.

Në kumtesë përkujtohet se kohë më parë në radhët e ARM-së u pranuan 125 ushtarë profesionistë, ndërsa me përfundimin e kësaj faze të pranimit e cila filloi këtyre ditëve, do të rrumbullakësohet edhe procesi i paralajmëruar për pranimin e 250 ushtarëve profesionistë në shërbim të ARM-së./Mia/