Afati për mbledhjen e nënshkrimeve për kandidatët për president dhe për kandidatë për deputetë fillon sot dhe do të zgjasë deri më 8 mars, sipas orareve të Komisionit Shtetëror të Zgjedhjeve (KSHZ). Kur parashtruesi i listës së kandidatëve për president është një grup votuesish, është e nevojshme të mblidhen së paku 10.000 nënshkrime nga zgjedhësit e regjistruar në Listën Zgjedhore, ndërsa kur paraqitësi i listës së kandidatëve për president janë deputetë, është e nevojshme që mbledhin të paktën 30 nënshkrime nga deputetët, përcjell Telegrafi Maqedoni.

Kandidatët për president dje u shpallën nga BDI, të cilët propozojnë ministrin e Punëve të Jashtme, Bujar Osmani dhe Lëvizja “ZNAM”, e cila do të dalë me liderin Maksim Dimitrievski. Paraprakisht LSDM-ja njoftoi se kandidati i tyre do të jetë kreu aktual i shtetit Stevo Pendarovski, OBRM-PDUKM propozon profesoresha Gordana Siljanovska Davkova, Stevço Jakimovski është kandidat i GROM-it, partisë që ai drejton, profesoresha Biljana Vankovska është kandidate e “Të Majtës”, Arben Taravari i koalicionit opozitar shqiptar “VLEN”, Velo Markovski ishte i pari që shpalli kandidaturën e tij të pavarur për president në tetor të vitit të kaluar, ndonëse është anëtar i OBRM-PDUKM-së.

Kandidaturën e Osmanit e ka bërë të ditur kryetari i BDI-së Ali Ahmeti, i cili ka paralajmëruar se pas zgjedhjeve do të avokojë për ndryshime kushtetuese, për zgjedhjen e presidentit në Kuvend dhe për përfshirjen e bullgarëve në Kushtetutë. Ndryshe, siç tha ai, BDI nuk do të marrë pjesë në qeveri.

Gordana Siljanovska-Davkova dje konfirmoi se është kandidate për presidente të shtetit nga OBRM-PDUKM, pasi ishte e vetmja që ishte regjistruar në thirrjen partiake.

Nga LSDM-ja pardje njoftuan se në mbledhjen e kryesisë është vendosur që si kandidat për kryetar të shtetit të përkrahet kreu aktual i shtetit Stevo Pendarovski.

Pjesëmarrësit në zgjedhje, listat e kandidatëve për kryetar të shtetit duhet t’i dorëzojnë KSHZ-së më së voni deri më 19 mars deri në mesnatë. Afati për mbledhjen e nënshkrimeve vlen si për zgjedhjet presidenciale ashtu edhe për ato parlamentare. Zgjedhjet presidenciale janë caktuar për 24 prill, ndërsa rrethi i dytë i zgjedhjeve është më 8 maj, kur duhet të mbahen edhe zgjedhjet parlamentare.