Dodik: BiH nuk është shtet i qëndrueshëm, mbijeton falë ndërkombëtarëve

15:16 | 15 Nëntor 2017
Arbresh.info

Presidenti i Republika Srpska Milorad Dodik tha se BiH nuk është një shtet i qëndrueshëm, por mbijeton për shkak të ndërhyrjes së madhe ndërkombëtare, transmeton portali arbresh.info

Dodik tha se ndërhyrja është joefektive dhe nuk është e njëjtë me pesë apo dhjetë vjet më parë.

“Serbët e pranuan Dejtonin dhe vendosën zgjidhje, por kurrë nuk donin të ishin në atë vend”, ka thënë ai

Duke folur për referendumin mbi pavarësinë e Republikës Serbe dhe çfarë do të ndodhte nëse iniciativa e pavarësisë merr mbështetjen e shumicës, Dodik tha se pala serbe ka të gjitha elementet për të funksionuar si një shtet.

“Ka territor, njerëz që duan atë, fuqi ekzekutive, marrëdhënie të mira rajonale. Do të ishte mirë që boshnjakët të ndaheshin. Përbindëshi nga BiH nuk mund të funksionojë”, thotë ai, duke shtuar se është e mundur të kryhet pa konflikt lufte./arbresh.info/