Kryeministri grek Aleksis Cipras menjiherë pas votimit ka uruar homologun e tij z.Zoran Zaev për sigurimin e 80 votave në Kuvend, që i hapin rrugën ndryshimeve kushtetuese si kusht kryesor i Marrëveshjes së Prespës.

 “Urime shoku im Zoran Zaev! Vota e sontme është një hap i madh përpara suksesit tonë të përbashkët. Një hap shumë i rëndësishëm drejt të ardhmes paqësore dhe prosperuese për popujt tanë!” – ka shkruar Aleksis Cipras në rrjetin social Twitter.

Qeveria e Maqedonisë ia doli mbanë të sigurojë votat për të miratuar nismën për ndryshimet kushtetuese, që i hap rrugën ndryshimit të emrit nga Republika e Maqedonisë ,në Republika e Maqedonisë së Veriut, e po ashtu edhe rrugën drejt integrimit euroatlantik të fqinjit tonë.

Në Kuvend votuan pro 80 deputetë, sa 2/3-tat e nevojshme për ndryshime kushtetuese. Tashmë qeverisë i jepen 15 ditë kohë për të paraqitur në Kuvend amendamentet për ndryshimin e Kushtetutës.