Në vend tani për tani nuk është zbuluar prania e etheve afrikane të derrave, bëri të ditur sot Agjencia për Ushqim dhe Veterinari (AUV), pasi Greqia dje edhe zyrtarisht e konfirmoi rastin e parë të sëmundjes në fshatin Nikokleia në rajonin e Seresit.

“Për shkak të ekzistimit të rrezikut real nga paraqitja e sëmundjes edhe në vendin tonë, ndërsa me qëllim të parandalimit të saj, mbarështuesit e derrave, shoqatat e gjuetisë dhe qytetarët t’i respektojnë vendimet e mara për zbatimin e masave mbrojtëse”, apelon AUV-ja.

Pas dyshimit të parë më tre shkurt autoritetet veterinere të Greqisë dje zyrtarisht e konfirmuan rastin e parë të derrave të sëmurë nga ethet afrikane në një familje rurale me 32 derra. Bëhet fjalë për mbarështuesit në fshatin Nikokleia në rajonin e Seresit.

Përveç në Greqi, sëmundja është e pranishme edhe në Serbi dhe Bullgari, ku sipas të dhënave zyrtare të cilat i merr AUV-ja, në bazë ditore paraqiten vatra të reja te derrat e egër, më së shumti në Bullgarinë verilindore dhe në kufirin me Rumaninë.

Ethet e derrave janë paraqitur edhe në Poloni, Lituani, Rumani dhe në vende të tjera./telegrafi