Në Ferizaj në kuadër të 25-vjetorit të çlirimit zbulohet shtatorja e ish-kryeministrit britanik, Tony Blair.

Në letrën dërguar drejtorit të Fondacionit Tony Blair,Bashkim Fazliut, ish-kryeministri i Mbretërisë së Bashkuar,Tony Blair, duke shprehur mirënjohjen për vendosmërinë për të ngritur shtatoren në qytetin e Ferizajt, si dhe duke ndjerë keqardhje për mospraninë e tij në këtë ngjarje, mes tjerash shkruan se miqësia e njerëzve të Ferizajt është jashtëzakonisht e rëndësishme për të dhe është jashtëzakonisht i përulur nga respekti që populli i Ferizajt ka shfaqur ndaj tij, teksa shton se Kosova gjithmonë do të jetë në zemrën e tij.

“Miqësia e njerëzve të Ferizajt është jashtëzakonisht e rëndësishme për mua dhe jam jashtëzakonisht i përulur nga respekti që ju dhe ata që keni shfaqur ndaj meje. Kam pasur nderin të pranoj ftesën e Presidentit tuaj për të vizituar Kosovën këtë javë. Kosova do të ketë gjithmonë një vend në zemrën time dhe jam i vendosur që në të ardhmen të vizitoj njerëzit e Ferizajt dhe shtatoren”, ka shkruar Blair.

Ndërkaq Bashkim Fazliu, drejtor i Fondacionit Tony Blair, tha se në 25 vjetorin e çlirimit të Kosovës, ky shtator po ngrihet në shenjë mirënjohje e falënderimi për kontributin e tij të jashtëzakonshëm për Kosovën, popullin tonë, për lirinë e ndaljen e spastrimit etnik të shqiptarëve të Kosovës.

Kurse kryetari i Ferizajt, Agim Aliu, duke folur për situatën e rëndë që ishte 25 vjet më parë, tha se liria sa ishte e largët në kujtesën e shekujve, aq ishte e afërt në kurorën e 12 qershorin për çdo shqiptar të Kosovës.

“Më 12 Qershor të vitit 1999 Kosova lindi në qershorin e këtij viti. Kjo datë me historinë që bartet mbi supe në gjakun që lau vatrat tona, me lavdinë që i mbetet krenar të epokave është rrënja ku rilindi Kosova”, tha kryetari Aliu.

Ndërkaq ambasadori i Mbretërisë së Bashkuar, Jonathan Hargreaves, duke përcjellë mesazhin nga ish-kryeministri Tony Blair, tha se ndonëse kishte planifikuar të ishte prezent në këtë ngjarje, megjithatë ndjehej i nderuar për këtë statujë.

Megjithatë, shtoi ambasadori i Mbretërisë së Bashkuar, ish-kryeministri Blair është i vendosur që në një të ardhme do të vizitojë këtë qytet.

Tutje, ambasadori, duke folur për vizitën e Blair-it, shtoi se vizita e tij nuk ishte e vetme e Mbretërisë së Bashkuar këtë javë, por janë shumë britanikë që vizituan Kosovën, qofshin ata veteranë, gazetarë, etj.,që ishin përfshirë në ngjarjet e asaj kohe.

Për këtë ngjarje kanë folur edhe Agim Çeku, ish-komandant i Shtabit të Përgjithshëm të UÇK-së dhe ish-kryeministër i Kosovës, Memli Krasniqi, kryetar i Partisë Demokratike të Kosovës, etj.

E punuar nga skulptori Agon Qosa, shtatorja e ish-kryeministrit britanik që ndihmoi në çlirimin e Kosovës, vendoset në përvjetorin e 25-të të çlirimit të Ferizajt, në sheshin që do ta mbajë emrin e tij./rtk