Kryesuesi i Komisionit Hetimor për gjendjen në PTK dhe Vala, Visar Ymeri, i ka reaguar lidhur me vonesën e dërgimit të dokumentacioneve të nevojshme nga menaxhmenti i PTK-së

Sipas Ymerit, Bedri Istrefi, Kryeshef Ekzekutiv i Telekomit Bedri Istrefi, ka kërkuar afat shtesë, me ç’rast Ymeri ka kërkuar dorëzimin e dokumentacionit të gatshëm dhe propozimin e një afati kur menaxhmenti mund ta dorëzojë pjesën tjetër të dokumentacionit.

Deri më tani Komisioni nuk ka marrë përgjigje në këtë çështje, e asnjë prej dokumenteve të kërkuara.

“Kjo vonesë e menaxhmentit të Telekomit bie ndesh me Ligjin për Hetimin Parlamentar i cili ia siguron Komisionit hetimor qasjen e pakufizuar në dokumentacion e prova (Neni Neni 13 pika 1.4.), si dhe obligon të gjitha institucionet, personat fizik a juridik, t’i dorëzojnë komisionit të gjitha dokumentet e provat e kërkuara (Neni 18, pika 4)”.

“Këtë vonesë në dorëzimin e dokumentacioni nuk mund ta kuptojmë ndryshe përveç se si pengesë në punën hetimore të Komisionit. Ose nuk po duan t’i dorëzojnë e kështu po veprojnë kundërligjshëm; ose nuk i dijnë se ku dhe si ti gjejnë e që flet për një inkompetencë të tmerrshme profesionale” tha Ymeri.

Ymeri tutje vuri në pah katër shkaktarë potencialë të cilët dyshohen ta kenë sjellë Telekomin në këtë gjendje.

“Kontratat e nënshkruara me palët e treta;
Punësimi – veçanërisht mbipunësimi që është bërë pa kurrfarë kriteri a nevoje, kryesisht i motivuar partiakisht e nepotist;
Ndërhyrjet qeveritare – ndalja e proceseve e projekteve zhvillimore të bëra nga qeveria më 2009 dhe 2010 për qëllime të privatizimit të Telekomit, si dhe marrja e dividendës pa kurrfarë kriteri e plani që ia ka cenuar rëndë kapacitetin financiar e investues Telekomit, duke i krijuar kështu hapësirë të padrejtë operatorëve tjerë (IPKO me vonë Z Mobile);
Shpenzimet e pakontrolluara të menaxhmenteve e bordeve të një pas njëshme për qëllime luksi”.