Kryetari i Lëvizjes Vetëvendosje, Visar Ymeri ka deklaruar se secila përkrahje financiare nga shteti për ndërmarrjet prodhuese do të kushtëzohet me punësimin e grave në së paku 40% të të punësuarve.

Kurse, secila pronë familjare, sipas tij, do të jetë bashkëpronësi mes gruas dhe burrit. “Na duhet angazhim masiv i secilit prej nesh. Gratë, vajzat, secila prej tyre, të gjitha bashkë, duhet të jenë të barabarta në shoqëri. Kjo barazi është përpjekje e përditshme, angazhim politik e publik që ta bëjmë barazinë politikë institucionale. Kundër diskriminimit e përjashtimit. Secila pronë e trashëguar do t’i ndahet barabartësisht vajzës ashtu edhe djalit. Gratë do të kenë përparësi në ndarjen e secilës banesave të përballueshme për qytetarët e Republikës. Kështu do ta ndërtojmë Republikën. Të barabartë për të gjithë. Por kjo bëhet vetëm nëse jemi bashkë në angazhim. Në përpjekje. Të barabartë publikisht, që të jemi të barabartë edhe privatisht”, ka shkruar Ymeri në facebook./Arbresh.info/