Komisioni Qendror i Zgjedhjeve ka publikuar të dhënat e para për pjesëmarrjen në raundin e dytë të zgjedhjeve për kryetarë komunash, që po mbahet sot, më 9 nëntor 2025, në 18 komuna të Kosovës, transmeton IndeksOnline.

Sipas të dhënave të publikuara në platformën zyrtare të KQZ-së, deri në orën 09:00 kanë votuar 22 mijë e 276 qytetarë nga gjithsej 1 milion e 316 mijë e 672 votues të regjistruar, që përfaqëson një pjesëmarrje prej vetëm 1.69 për qind.

Në këtë proces janë hapur 507 qendra të votimit me gjithsej 1 mijë e 628 vendvotime, nga të cilat 81.51 për qind janë tashmë të procesuara për raportim të pjesëmarrjes.

Kjo është platforma elektronike e KQZ-së për publikimin e rezultateve preliminare dhe statistikave për pjesëmarrjen në votime për çdo komunë, qendër votimi dhe vendvotim në raundin e dytë të zgjedhjeve për kryetarë të 18 komunave: https://resultslocal2025r2.kqz-ks.org/

Në këtë platformë do të publikohen të dhëna për pjesëmarrjen e votuesve në votime nga 507 qendra të votimit me gjithsej 1 mijë e 628 vendvotime, si dhe rezultatet preliminare të zgjedhjeve për kryetarë të komunave pas përfundimit të numërimit të fletëvotimeve në vendvotime.

Sipas Ligjit për Zgjedhjet e Përgjithshme, numërimi i fletëvotimeve të zgjedhjeve për kryetarë të komunave dhe të subjekteve politike duhet të bëhet në vendvotim, pasi të përfundojë procesi i votimit.