Kreu i PDK-së, Kadri Veseli ka mbajtur një konferencë për media, pas njoftimit të Prokurorit Special pranë Dhomave të Specializuara për ngritje të aktakuzës ndaj tij dhe presidentit, Hashim Thaçi.

Veseli, tha se prokurori i Specializuar është ngutur me publikimin e aktakuzës ndaj tij dhe presidentit Thaçi, ende pa u konfirmuar aktakuza nga gjykata.

“Zyra e Prokurorit Special pranë Dhomave të Specializuara sot ka  lëshuar sot një deklaratë për shtyp, ku njofton se ka ngritur aktakuzë ndaj meje dhe ndaj presidentit Hashim Thaçi. Me një veprim të paprecedent, prokurori ka lëshuar deklaratën para se gjykata t’i konfirmoj ose rrëzojë akuzat e ngritura që ai pretendon”, tha Veseli, raporton arbresh.info.

Ai, mohoi çfarëdo pretendimi se ka tentuar të pengojë punën në Dhomën e Specializuar.

“Në këtë deklaratë, prokurori përpiqet ta arsyetojë vendimin e tij të padrejtë dhe të pazakonshëm, duke pretenduar se unë dhe presidenti kemi tentuar të pengojmë punën e Dhomave të Specializuara. Dyshimet e ngritura, janë plotësisht të pavërteta dhe nuk qëndrojnë. Po ashtu nuk ka kurrfarë baze për pretendimet  për pengim të punës së gjykatës”, u shpreh Veseli./arbresh.info