Sindikata e Punëtorëve e RTK-së i bën thirrje Kuvendit të Kosovës që urgjentisht t’i ndajë paratë për ndërtimin e objektit të ri të RTK-së.

“Të nderuar deputetë, nga shiu i rrëmbyeshëm që ka rënë para pak orësh, janë vërshuar të gjitha studiot e RTK-së, duke e vënë në pikëpyetje edhe funksionimin e rregullt të programit ditor”, thuhet në reagimin e sindikatës.

Nga vërshimi i studiove rrezikohet edhe jeta e kolegëve tanë për shkak ekspozimit ndaj energjisë elektrike në të gjitha studiot, thuhet më pas aty, transmeton lajmi.net.

“Sindikata i bën thirrje edhe Qeverisë së Kosovës që ta dërgojë urgjentisht ligjin e ri të RTK-së në Kuvend, në mënyrë që të miratohet nga deputetët sa më shpejt që të jetë e mundur”.

Sipas tyre, çdo vonesë në mosplotësimin e këtyre kërkesave, ne e konsiderojmë presion dhe ndërhyrje në mediumi publik RTK.

Sindikata kërkon që nga fillimi i vitit 2019, buxheti i RTK-së të mblidhet nga parapagimi për të siguruar pavarësi editoriale për RTK-në.

Sindikata po ashtu kërkon që sa më parë të sigurohen mjetet dhe të fillohet me procesin e digjitalizimit. /Lajmi.net/