Universiteti i Prishtinës (UP) ka përsëritur thirrjet drejtuar të gjitha organeve ligjzbatuese për të ndërhyrë në ndalimin e aktiviteteve ilegale ndërtimore dhe biznesore në hapësirat e kampusit qendror, veçanërisht mes Bibliotekës Qendrore Universitare dhe Institutit të Kimisë.

Sipas njoftimit të UP-së, personeli i universitetit ka njoftuar më 23 shtator dhe 25 tetor 2025 Inspektoratin e Komunës së Prishtinës për këto punime të jashtëligjshme.

“Megjithatë, vizita në terren e drejtorit të Inspektoratit më 27 tetor 2025 nuk solli asnjë veprim konkret, duke lejuar vazhdimin e aktiviteteve ilegale”, thuhet në reagimin e UP-së.

Universiteti denoncon se, përkundër deklaratave zyrtare të komunës se objektet po rinovohen për nevojat e studentëve, aktualisht hapësira po përdoret për qëllime komerciale.

UP-ja ka thënë se faqja e subjektit në rrjetin social Facebook e prezanton objektin si “Zoe Hotel”, “një hotel luksoz që synon klientelën e biznesit dhe turizmin urban, duke devijuar nga misioni akademik dhe shërbimi ndaj studentëve”.

UP-ja paralajmëron se nëse institucionet ligjzbatuese nuk ndërhyjnë për të ndalur këto veprimtari, universiteti rezervon të drejtën legjitime për të penguar qasjen e palëve të treta në hapësirat e tij.

“Menaxhmenti i UP-së është i vendosur për të rikthyer pronat e uzurpuara në shërbim të dijes, përparimit shoqëror dhe zhvillimit ekonomik, duke mbrojtur misionin e mësimdhënies, kërkimit shkencor dhe aktiviteteve studentore”, vijon reagimi.