Halil Matoshi nga Aleanca për Ardhmërinë e Kosovës, Analizën Zgjedhore, ka thënë se udhëheqja e sotme e Lidhjes Demokratike të Kosovës ‘rugovizmin’, në të cilin thirret aq shumë, e ka parë vetëm në televizor, pasi nuk përfaqëson asgjë nga ajo.

“Establishmenti – udhëheqja e sotme e Lidhjes Demokratike të Kosovës ‘rugovizmin’ e ka parë vetëm në televizor. Unë jam një nga nënshkruesit e Konventës Themeluese të LDK-së. Dhe unë e di që ‘rugovizmi’ nuk është përplasje, apo gjuhë agresive, sic po e shohim në këtë fushatë zgjedhore nga ky subjekt politik”.

Ai po ashtu ka thënë se Lidhjea Demokratike të Kosovës nuk ka të drejtë morale ta cilësojë koalicionin PDK-AAK-NISMA ‘koalicion të territ dhe krimit’, përderisa brenda listës zgjedhore të koalicionit LDK-AKR-Alternativa, ka njerëz të cilët i kanë dhënë epitete të ndryshme LDK-së, sic edhe anëtarë të kësaj partie i kanë dhënë cilësime të ndryshme kryetarit të AKR-së, Behgjet Pacolli.

“Sot udhëheqja e LDK-së e quan koalicionin PDK-AAK-NISMA ‘koalicion të territ dhe krimit’, derisa aty ka njerëz, gra dhe burra të devotshëm, që kanë dhënë gjithcka nga vetja, edhe gjymtyrë, pa pritur dhe kërkuar asgjë. Tash LDK-ja e konsideron koalicionin që ka bërë ‘të dritës’, derisa dikur e ka konsideruar Behgjet Pacollin ‘njeri të fushave të Afganistanit’”.