Presidenti i Republikës së Kosovës, Hashim Thaçi ka vazhduar akuzat e tij ndaj kryeministrit në largim, Albin Kurti.

Thaçi, përmes një postimi në Facebook, ka shkruar se Kurti po i vazhdon mashtrimet e tij patriotike me vendime strategjikisht të gabueshme.

Sipas Thaçit, me vendimet e tij të fundit, Kurti në kundërshtim me kërkesat dhe pritjet e Shteteve të Bashkuara të Amerikës, por edhe të BE-së,  po rrezikon tërë atë që ka arritur dhe ndërtuar Kosova për më shumë se dy dekada./arbresh.info

Reagimi i plotë i Thaçit:

Në përpëlitjet e fundit para se të largohet nga zyra, Kurti po i vazhdon mashtrimet patriotike me vendime strategjikisht të gabueshme. Me vendimin për kinse reciprocitet, ai vazhdoi duke bërë hapa në kundërshtim me kërkesat dhe pritjet e Shteteve të Bashkuara të Amerikës, por edhe të BE-së, duke rrezikuar tërë atë që kemi arritur dhe ndërtuar për më shumë se dy dekada. Kosova ka fituar lirinë dhe shtetësinë me përkrahjen e SHBA-së dhe partnerëve evropianë dhe vetëm me këtë përkrahje e partneritet ka të ardhme të sigurt. Çdo cenim i këtyre raporteve është rrezikim i shtetit dhe rrezikim i së ardhmes së Kosovës. HTH