Shefi i grupit parlamentar të PDK-së, Abelard Tahiri, ka deklaruar se të gjithë aleatët që Kosova i ka pasur tash e 20 vite, nuk i ka më në krah.

Për këtë, Tahiri e ka akuzuar kryeministrin Kurti.

“Kosova është në një pozitë të pafavorshme, të gjithë miqtë që i kemi pas nga procesi i Rambujesë, Pavarësia, dialogu në Bruksel, ne sot fatkeqësisht duket që miqtë tanë nuk i kemi më në krah. Si ka arrit me sjellë në këtë gjendje, atë e din veç kryeministri Kurti.”, tha Tahiri para mediave.

Ai ka vlerësuar se mungesa e takimit të kryeministrit Kurti me zyrtarë të lartë të Departamentit amerikan të Shtetit, është shqetësuese dhe se Qeveria e ka shndërruar Kosovën në temë të dialogut e jo në palë.

“Është hera e parë që drejtuesit e shtetit të Kosovës nuk arrijnë të takohen me drejtues të lartë të shtetit amerikan. Një javë para takimit, sekretari amerikan i shtetit të takohet me Vuciçin e jo me Kurtin, është sinjal shumë i keq. Kurti ka arrit që Kosovën me e bë temë në dialog me Serbinë, e jo palë.”, ka thënë Tahiri pas mbledhjes së Kryesisë së Kuvendit.

Raporton, Emir Abduramani