Shefi i Grupit parlamentar të AAK-së, Besnik Tahiri, tha se sonte u tentua të kontrabandohej një ligj dhe se ngjarja e sotme shpërfaqi një qasje të paparë ndonjëherë në historinë demokratike të Kosovës.

Tahiri pohoi se partia e tij nuk ka votë për Vjosa Osmanin si presidente dhe tha se nuk do të bëjnë kuorumin.

“Ishte një moment i mirë që ky ligj i cili fatkeqësisht u tentua të kontrabandohet dhe shpërfaqi një kulturë dhe një qasje të paparë ndonjëherë në historinë demokratike të Kosovës u bë shumë mirë që nuk kaloi. AAK edhe në diskutimin në komisionin e Legjislacionit, mirëpo edhe në diskutimin në Kuvend kërkon që për tema të cilat lidhen drejtpërdrejtë me reformën zgjedhore, për tema të cilat i prekin drejtpërdrejtë partitë politike, qytetarët e Kosovës të ketë një konsultim paraprak dhe si e tillë e kundërshtojë”, tha Tahiri.

Ai, u shpreh se nuk votojnë dhe nuk marrin pjesë në seancën ku do të votohet për Vjosa Osmanin si presidente.

“Sa i përket votimit të presidentes, ne e kemi të qartë, ne e kemi pasur dhe e kemi kandidatin tonë Ramush Haradinaj, që mendojmë se është kandidati më i drejtë, kandidati më i dëshmuar, kandidati i cili ka dhënë argumente si gjatë luftës edhe pas luftës se është një lider udhëheqës, unifikues. Nuk votojmë, nuk marrim pjesë, nuk bëjmë kuorum sa i përket zgjedhjes së presidentes”, tha ai./arbresh.info/