Prokuroria Speciale të Kosovës ka ngritur aktakuzë ndaj 10 personave si të dyshuar për pjesëtarë të organizatës kriminale “Syri i Popullit”.
Gjatë ditës është raportuar për planet, strukturën dhe detajet e organizimit të kësaj organizate sipas përshkrimit në aktakuzën 79-faqeshe të Prokurorisë Speciale.

Pjesë shumë interesante e kësaj aktakuze është ajo ku përshkruhen planet e kësaj organizate ndërsa gjithashtu aktakuza përshkruan edhe një pjesë të formës së financimit, raporton kallxo.com.

Siç përshkruhet në aktakuzë, fondi “Liria e Atdheut”, fond ky i krijuar nga organizata, do të funksiononte në atë mënyrë që për çdo qytet të caktohej një veprimtar i fondit, i cili do të kishte detyra interesante.

“Për çdo qytet caktohet një veprimtar i fondit “Liria e Atdheut”, nga një pronar firmë-kompanie serioze, ky kontakton në 4 sy me firmat e qytetit me rrethinë dhe kërkon ndihma të rregullta mujore prej firmave-kompanive”, përshkruhet në aktakuzën e Prokurorisë Speciale të Kosovës.

Gjatë ditës u publikuan raporte të detajuara të bazuara në aktakuzën e Prokurorisë Speciale të Kosovës.

Murat Jashari, Avni Llumnica, Ragip Sallova, Sadri Ramabaja, Rexhep Topllana, Bajrush Konjusha, Sabit Berisha, Halim Halimi, Bexhet Luzha dhe Lirije Luzha janë pjesë e aktakuzës që i ngarkon për përgatitje të veprave terroriste ose veprave penale kundër rendit kushtetues dhe sigurisë së Republikës së Kosovës.

Murat Jasharit aktualisht i është caktuar masa e trajtimit psikiatrik.

Asnjë nga të akuzuarit në deklarimet e tyre sipas aktakuzës nuk i kanë pranuar pretendimet e Prokurorisë të përshkruara në aktakuzë.