Demokracia në Veprim ka reaguar lidhur me raportimin për sulmin e bërë ndaj një monitoruese të angazhuar në monitorimin e fushatës para zgjedhore në regjionin e Gjakovës.

Sipas DMV-së, monitoruesja F.F është goditur sonte nga një vajzë, e cila ka qenë e shoqëruar edhe nga tre djem të tjerë, jashtë rrethojës së shkollës ‘Mazllom Këpuska’ në Gjakovë.

Ky është reagimi i plotë:

Reagim ndaj sulmit të monitorueses së DnV-së në Gjakovë

Demokracia në Veprim me shqetësim ka pranuar lajmin se monitoruesja e saj afatgjate F.F. që është e angazhuar ta monitoroj fushatën para zgjedhore në regjionin e Gjakovës, është goditur sonte nga një vajzë, e cila ka qenë e shoqëruar edhe nga tre djem të tjerë, jashtë rrethojës së shkollës “Mazllom Këpuska” në Gjakovë, pak pasi ka përfunduar monitorimin e fushatës së një subjekti politik në atë shkollë.

E njëjta nga goditja ka pësuar lëndime të lehta në fytyrë dhe në trup pas rrëzimit në tokë. Monitoruesja rastin e ka paraqitur në Polici ku ka dhënë deklaratë.

Demokracia në Veprim i bënë thirrje organeve të rendit, e në rastin konkret Policisë që sa më shpejtë të vë para drejtësisë autorët e sulmit. Demokracia në Veprim, shpreson që sulmi nuk ka të bëjë asgjë me punën e monitorueses në vëzhgimin e fushatës.

Demokracia në Veprim ju bënë të qartë të gjitha subjekteve politike se roli i monitoruesve të DnV-së është përcjellja e fushatës dhe raportimi në mënyrë të paanshme. Pavarësisht sfidave, Demokracia në Veprim mbetet e përkushtuar në kryerjen e misionit të saj.