Ish-Qeveritë e Kosovës të udhëhequr nga Ramush Haradinaj dhe Albin Kurti shpenzuan pothuajse sa të hyrat.

Për tre muajt e parë të këtij viti, totali i shpenzimeve kishte arritur në 400.3 milionë euro, shkruan arbresh.info.

Ndërsa të hyrat ishin pak më të mëdha, saktësisht 402.4 milionë euro.

Kështu bëhet e ditur në raportin ‘Llogaritë Qeveritare të Kosovës për TM1 2020’, të publikuar nga Agjencia e Statistikave të Kosovës (ASK) publikon Llogaritë Qeveritare të Kosovës për TM1 2020.

Aty thuhet gjithashtu se pjesa më e madhe e të hyrave ishte nga tatimet në produkte.

“Shuma e përgjithshme e të hyrave të Qeverisë për TM1 2020 ishte 402.4 milionë Euro. Pjesën më të madhe të të hyrave e përbëjnë tatimet në produkte, të cilat paraqesin 73.4% të totalit të të hyrave, ndërsa pjesa e mbetur e të hyrave është shpërndarë në kategori të tjera të të hyrave”, thuhet në raport.

Ndërsa pjesën më të madhe të shpenzimeve e përbënte kompensimi i punëtorëve.

“Në TM1 2020, totali i shpenzimeve të Qeverisë së përgjithshme ishte 400.3 milionë Euro. Pjesën më të madhe të shpenzimeve e përbëjnë kompensimi i punëtorëve (38.6%), kontributet sociale dhe përfitimet (33.2%), konsumi i ndërmjetëm (10.1%), dhe formimi i kapitalit bruto (6.2%). Kurse, pjesa e mbetur e shpenzimeve është shpërndarë në struktura të tjera të shpenzimeve”, thuhet në raportin e publikuar nga Agjencia e Statistikave të Kosovës (ASK)./arbresh.info/