Drejtori i Shëndetësisë në Komunën e Prizrenit, Visar Shehu, ka thënë se njëri nga pacientët e hemodializës që ishte infektuar me Covid-19 në Spitalin Rajonal të kësaj komune, është drejt shërimit dhe se ky institucion shëndetësor nuk menaxhohet nga komuna.

Nga Spitali Regjional i Prizrenit janë infektuar disa pacientë dhe një pjesë e stafit të repartit të hemodializës, e njëri prej tyre, pacient nga Rahoveci, sot ka ndërruar jetë në Klinikën Infektive në Prishtinë.

“Në repartin e hemodializës janë gjashtë pacientë pozitivë. Mbrëmë njëri nga ta ka rezultuar negativ. Nëse edhe sonte nga testimi del negativ, ai llogaritet i shëruar”.

“Komuna e Prizrenit nuk e menaxhon spitalin, por kjo bëhet nga Ministria e Shëndetësisë, ndërkohë komuna ka përgjegjësi kujdesin parësor shëndetësor”.

“Kemi marr të gjitha masat për pandeminë në fjalë, por unë s’mund ta them nëse janë marr masat e duhura apo jo, pasi kjo i përket inspektoratit të shëndetësisë“.

“Numri total i personave që momentalisht janë aktivë me koronavirus në Komunën e Prizrenit është 60”. Sot janë bërë 13 ritestime për herë të dytë”.

“Menaxhimi i situatës ka shkuar mirë deri më tani. Intensiteti i virusit ka filluar të bie, megjithatë ne do t’i zbatojmë të gjitha masat e lëvizjeve”.

“Distancimi social duhet të vazhdojë. Masat mbrojtëse siç janë maskat dhe dorëzat duhet të vazhdojmë t’i zbatojmë, dhe se moszbatimi i këtyre rregullave mundet të penalizohet”, u shpreh Shehu për Edicionin Special në Klan Kosova.