Anëtari i këshillit Grevist dhe Përfaqësues i Shoqatave Sindikale të nivelit qendror, Ali Sefaj, ka reaguar pasi që Ministria e Financave ua ka ndalur pagat e Shërbyesve Civil e që sipas qeverisë së Kosovës, është bërë duke u bazuar në fuqi me ligjin për grevat në Kosovë.

Dje kryeministri i Kosovës, Albin Kurti në një deklarim për media ka thënë se për të marrë pagën duhet të kryhet një punë. Ndërsa Ali Sefaj nga këshillit Grevist, përmes faqes së tij në “Facebook”, thotë se janë të gatshëm të sakrifikojnë për Kosovën.

“Veq 400 zyrtarëve serb të strukturave paralele që marrin paga qe tetë vite, pa dalë asnjë ditë në punë, e duke e luftuar për ditë shtetin e Kosovës, të mos ua ndalni pagat, se për ne të tjerëve s‘ka problem. Ne jemi të gatshëm të sakrifikojmë për Republikën”, ka shkruar Sefaj.

Greva po vazhdon, nëpër institucione të Kosovës, duke bërë që në përgjithësi arsimi në Kosovë të jetë i bllokuar si dhe disa institucione të tjera./arbresh.info/