Në kuadër të bashkëpunimit ushtarak ndërmjet Forcës së Sigurisë së Kosovës dhe Forcave të Armatosura të Republikës së Shqipërisë (FARSH), një delegacion nga Komanda Mbështetëse e FARSH-it, udhëhequr nga komandanti Aleksandër Pando, ka qëndruar në vizitë në Komandën e Logjistikës të FSK-së.

Sipas njoftimit të FSK-së, delegacioni u prit nga zëvendëskomandanti i Komandës së Logjistikës, Mehmet Lladrovci, që i njoftoi homologët nga FARSH me të arriturat, sfidat, ngritjen e kapaciteteve, misionin dhe detyrat e Komandës së Logjistikës, strukturën organizativ, aktivitetet dhe zhvillimet tjera në fushën e Logjistikës dhe Mjekësore, transmeton Klankosova.tv.

“Gjithashtu është realizuar vizitë në servisin për Automjetet e Rënda, ku patën mundësin të shohin nga afër kapacitetet e mirëmbajtjes”.

“Gjatë kësaj vizite u rikonfirmua përkushtimi i ndërsjellë për thellimin e bashkëpunimit dhe avancimin e mëtejshëm të kapaciteteve logjistike dhe mjekësore, përmes planeve bilaterale dhe shkëmbimit të përvojave dhe praktikave më të mira ndërmjet dy forcave”, thuhet në njoftimin e FSK-së.