Rrahim Pacolli ka reaguar pas anulimit të lejes për tu kthyer në vend politikanit Behgjet Pacollit.

Ai thotë se kjo është e padrejtë dhe se po bëhet për qëllime politike, transmeton portali arbresh.info.

“Pas dy muajsh karantinimi së bashku me familjen tij në Zvicër, nën asistencën shëndetësore, Behgjet Pacollit, nuk i lejohet të kthehet në Kosovë. Kjo është e padrejtë dhe po bëhet për qëllime politike”, shkruan Rrahim Pacolli.

Tutje ai thotë se mohimi për të përfaqësuar popullin në Kuvend është i papranueshëm.

“Behgjet Pacolli është i zgjedhur nga populli të përfaqësojë atë në Kuvend dhe mohimi i kësaj të drejtë është i papranueshëm. E aq më keq, që ai edhe e ka votuar këtë qeveri, pa asnjë kusht, vetëm pse ka besuar që do të qeverisë drejtë dhe për të mirën e vendit. Akti ndaj tij, është në kundërshtim me gjithë ligjet ndërkombëtare, madje dhe me vendimin e fundit të Gjykatës kushtetuese. Rr.P”, përfundon ai shkrimin e tij./arbresh.info/