Kryeministri në detyrë, Albin Kurti, nuk ka dhënë asnjë përgjigje për mediat sot lidhur me formimin e qeverisë apo mundësinë e zgjedhjeve të jashtëzakonshme.

Edhe dje, Kryetari i Lëvizjes Vetëvendosje (LVV), Albin Kurti, nuk ka komentuar në lidhje me refuzimin e ftesës për konsultim që i bëri Kryetari i Lidhjes Demokratike të Kosovës (LDK), Lumir Abdixhiku, gjatë ditës së martë. Po ashtu, Kurti nuk dha përgjigje as nëse do t’i ftojë partitë e tjera për të diskutuar këtë çështje.

Gjatë vizitës në Koshare të mërkurën, Kurti u pyet nga mediat për refuzimin e Abdixhikut, por nuk dha asnjë përgjigje.

Kurti kishte ftuar kryetarin e LDK-së për takim konsultues gjatë ditës së djeshme, në tri orare të ndryshme.

Megjithatë, kreu i LDK-së theksoi se gjuha e përdorur nga LVV-ja karshi LDK-së ka pamundësuar çdo mundësi për bashkëpunim midis këtyre dy partive në formimin e Qeverisë së re.