Sot gjatë ditës portali Arbresh.info, ka raportuar për punësimet familjare që janë bërë në Ministrinë e Mjedisit dhe Planifikimit Hapësinor, gjegjësisht në dikasterin që udhëhiqet nga Albena Reshitaj.

E reagimi i ministres Reshitaj ishte i menjëhershëm ku demantoi raportimin, duke thënë se nuk është bërë asnjë shkelje ligjore.

“Në lidhje me shkrimin e publikuar në portalin ”Arbresh. Info”, mbi pretendimet për punësimet e paligjshme në kabinetin e ministres Albena Reshitaj, sqarojmë se pretendimet e tilla nuk qëndrojnë dhe si të tilla dëmtojnë etikën e gazetarisë duke tentuar të manipulojnë opinionin publik. Punësimet në kabinetin e ministres Reshitaj nuk janë të jashtëligjshme dhe bazohen në Rregulloren për Fushat e Përgjegjësisë Administrative të Zyrës së Kryeministrit dhe Ministrive me nr. 02/2011. Në bazë të kësaj Rregulloreje, e cila specifikon emërimin e kabinetit të ministres sqarojmë se znj. Andrra Pllana dhe znj. Adelina Mehiu janë emëruar si asistente të ministres, duke mos shkelur asnjë procedurë ligjore”, thuhet në reagimin e Ministrisë së Ambientit dhe Planfikimit Hapsinor.

Ne si redaksi ia kujtojmë opinionit dhe ministres përkatëse që në lajmin e publikuar nga Arbresh.info, askund nuk thuhet që është bërë shkelje ligjore, por se është bërë punësim familjar.

Kjo mund të vërtetohet edhe në ueb faqen e MMPH ku figuron punësimi i Andrra Pllanës dhe Adelina Mehiut.

Portali Arbresh.info mbetet i përkushtuar në informimin e saktë të qytetarëve pa anime partiake e politike. Kudo në qeveri apo institucione publike ku të ketë informata për punësime familjare apo nepotizëm do të raportohen.

Për hir të korrektësisë dhe informimit të drejtë të qytetarëve LEXONI lajmin e postuar sot në Arbresh.info.

Kabineti i kunatave dhe akrabave