Kryetari i Kryeqytetit, Përparim Rama, së bashku me Drejtorin e Shërbimeve Publike, Bekim Brestovci, vizituan Qendrën për Trajtimin e Qenve Endacakë.

Rama theksoi se ky është një punë e madhe që është kryer dhe po vazhdohet të kryhet në kryeqytet.

“ E dimë që kemi pas sfida të mëdha me qentë endacakë dhe vazhdojmë të kemi. E dimë që qeverisja e kaluar i ka vaksinuar dhe sterilizuar. Ne për katër vite kemi vaksinua, sterilizua 1 mijë qen. Sot po e japim për adaptim qenin e 1000-të që do të thotë kemi interes nga qytetarët. Këtë punë po e bëjmë pa ndihmë nga niveli qendror. Edhe pse para 3 viteve kane ndarë buxhet. Ky problem duhet të zgjidhet jo vetëm në Prishtine por edhe komunat e tjera. Ne vendet e tjera problemi është zgjidhur për 15 vite. Vetëm vitin e kaluar 194 incidente apo kafshime, tre kane qenë fëmijë. Ndërkaq tani i kemi 40 e diçka incidente prej tyre dy fëmijë. Sot kërkoj nga Qeveria e Kosovës të na bashkëngjitet, jo vetëm të ndajë buxhet e të mos e shfrytëzojnë. Vetëm ne bashkëpunim me ministri komuna mund ta rregullojmë.” , u shpreh ai.

Ai shtoi se sistemi që kanë krijuar monitoron personat që dëshirojnë të adoptojnë qentë endacakë dhe se gjobat për mostrajtimin e duhur të qenve pas adoptimit arrijnë deri në 3 mijë euro.

Për më tepër, Rama dhe Brestovci patën mundësinë të ndjekin nga afër procesin e adoptimit të qenit të 1000-të, raporton Arbresh.info.

Ndryshe, në kryeqytet është duke u zhvilluar një operacion për kapjen e qenve endacakë.

Më 27 mars, janë kapur gjithsej 6 qen, të cilët janë transportuar në Strehimoren e Kryeqytetit për trajtim dhe strehim./Arbresh.info