Policia e Kosovës ka njoftuar se është duke kryer hetime lidhur me shkaqet e përhapjes së zjarreve në disa pjesë të Kosovës.

Sipas një komunikate të PK-së, të gjithë personat e dyshuar që më qëllim apo nga pakujdesia e tyre kanë shkaktuar zjarret do të përballen me organet e drejtësisë.

“Policia e Kosovës është angazhuar në mënyrë intensive në hetimin e shkaktarëve të zjarreve dhe të gjithë personat/individët që dyshohen se kanë shkaktuar zjarrvënie të qëllimshme, apo si pasojë e neglizhencës së tyre, do të përballen me organet e drejtësisë”, thuhet në komunikatë.

Po ashtu policia thotë se me kapacitet të plota është duke angazhuar në zonat ku ka zjarre në shuarjen e tyre.

“Policia e Kosovës me kapacitetet e saj në dispozicion po angazhohet me përkushtim në parandalimin dhe shuarjen e zjarreve duke ofruar asistencë me pajisje policore si topat e ujit si dhe duke koordinuar aktivitetet me agjencionet tjera në të gjitha rajonet ku janë raportuar vatra zjarri”, thuhet në komunikatë./arbresh.info/