Policia e Kosovës ka dhënë detaje për aksidentin e sotëm në magjistralen Prishtinë-Pejë, përkatësisht në Vragoli.

Rastin për Arbresh.info ka konfirmuar zëdhënësi i Policisë për rajonin e Prishtinës, Bajram Krasniqi, i cili na konfirmoi se në këtë aksident janë 30 persona të lënduar.

Aksidenti ka ndodhur në orën 15:50 dhe kanë qenë të përfshirë një autobus me targa të huaja, një kamion me targa vendore dhe një veturë po ashtu me targa vendore.

“Në ora 15:50, policia është njoftuar për një aksident trafiku të ndodhur në rrugën nacionale Prishtinë-Pejë (fshati Vragoli). Në aksident është përfshirë një autobus me targa të huaja, një kamion me targa vendore dhe një veturë po ashtu me targa vendore. Njësitet përkatëse policore kanë dalë në vend-ngjarje. Si pasojë e aksidentit janë rreth 30 persona që kanë pësuar lëndime. Janë njoftuar edhe ekipet mjekësore. Më pas do t’u ofrojmë të dhëna të përditësuara lidhur me aksidentin”, thuhet një përgjigjen e policisë./Arbresh.info/