Ekipi negociator i Kosovës në bisedimet me Serbinë, është duke përgatitur një platformë të bisedimeve, e cila shfaqë unitetin e Republikës së Kosovës, pavarësisht që dy partitë më të mëdha opozitare në vend Lidhja Demokratike e Kosovës dhe Lëvizja Vetëvendosje, nuk e kanë përkrahur këtë ekip.

Kështu tha për Radion Evropa e Lirë, zëvendëskryeministri Fatmir Limaj, i cili bashkë me kryetarin e Partisë Socialdemokrate, Shpend Ahmetin, janë bashkëdrejtues të delegacionit të Kosovës në këtë proces.

Limaj tha se kjo platformë do të jetë shtylla kryesore ku do të bazohet i tërë procesi i bisedimeve ndërmjet Kosovës dhe Serbisë. Ai nuk ka bërë të qartë nëse përmes kësaj platforme do të bëhen të qarta vijat e kuqe për çka nuk do të mund të bisedohet me Serbinë.

“Ideja është që të dalim me një platformë e cila reflekton qëndrimin unik të Republikës së Kosovës. Si dokument i cili do të jetë udhërrëfyes i delegacionit shtetëror të Kosovës, i institucioneve të Kosovës dhe kështu Kosova ta ketë një mesazh, një zë në bisedimet e ardhshme me Serbinë”, thotë Limaj.

Ekipi negociator që u krijua në gjysmën e dhjetorit të vitit të kaluar nga Kuvendi i Kosovës, është duke pritur koordinim dhe ide për vazhdimin e këtij procesi edhe nga presidenti Hashim Thaçi.