Gjykata Themelore në Prishtinë sërish ka vendosur që të mos pezullohet vendimi i i Inspektoriatit të Trashëgimisë Kulturore lidhur me sheshin Xhorxh Bush.

Herën e fundit, Gjykata e Apelit ka aprovuar ankesën e Komunës së Prishtinës në lidhje me vendimin për shndërrimin e rrugës “Xhorxh Bush” në shesh për këmbësorë, duke anuluar kështu vendimin e mëparshëm të Gjykatës Themelore dhe duke e kthyer çështjen për rishqyrtim.

LEXO EDHE:

Gjykata e Apelit aprovon ankesën e komunës së Prishtinës për sheshin “Xhorxh Bush”, lënda kthehet në rishqyrtim

Lidhur me këtë ka reaguar ministri në detyrë i Kulturës, Hajrulla Çeku i cili tha se Komuna e Prishtinës mori të njëjtën përgjigje nga gjykata edhe në herën e dytë.

“Provuan një herë, dështuan. Provuan për së dyti, prap e morën të njëjtën përgjigje nga gjykata: REFUZOHET si e pabazuar kërkesa e komunës së Prishtinës. Po, bëhet fjalë për projektin e kundërligjshëm të sheshit “Xhorxh Bush”.”, ka shkruar ai.

“Gjykata dy herë foli qartë, nuk pezullohet vendimi i Inspektoriatit të Trashëgimisë Kulturore. Nga fillimi ju kemi treguar që janë duke e shkelur ligjin me dy këmbë. Por ata vazhduan me qasjen e tyre shpërfillëse, e për më keq, na akuzuan për bllokim. Nuk i morën lejet e nevojshme, nuk i konsultuan banorët, nuk i zgjidhën çështjet pronësore, lidhën kontratë të kundërligjshme, gjykata dy herë ua refuzoi kërkesën për pezullim. “, u shpreh Çeku.

“Zgjidhjet e qëndrueshme për Prishtinën do të nisin pas 12 Tetorit. Me vizion zhvillimor dhe me ligjshmëri të plotë.”, theksoi mes të tjerash ai./Arbresh.info/