Kryetari i PDK-së, Memli Krasniqi, ka theksuar sot se pesë vjet pas ndalimit të katër udhëheqësve kryesorë të luftës çlirimtare – Hashim Thaçi, Kadri Veseli, Jakup Krasniqi dhe Rexhep Selimi – procesi në Hagë vazhdon të zvarritet, duke rritur padrejtësinë, ndërsa e vërteta ende nuk ka marrë verdiktin që i takon.

Ai shtoi se historia e vendit nuk mund të rishkruhet në asnjë gjykatë, pasi është shkruar me gjak, sakrificë dhe qëndresën e një populli që nuk u përkul kurrë.

“Ata shkuan në Hagë me kokën lart, pa u fshehur, pa u ankuar, pa kërkuar privilegje. Shkuan si burrështetas, si ushtarë të lirisë, me besim në drejtësi, me dinjitetin që ua dha historia dhe me dashurinë që ia dhanë Kosovës. Dhe kjo histori e vendit tonë nuk mund të rishkruhet në asnjë gjykatë. Ajo është shkruar me gjak, me sakrificë dhe me qëndresën e një populli që nuk u përkul kurrë. Për 1,826 ditë, ata dhe familjet e tyre kanë përballuar vuajtjen me qetësi, me durim e me besim. Për hir të së vërtetës dhe të drejtësisë”, shkroi Krasniqi./Arbresh.info