Katër personat e vdekur mbrëmë në një aksident të rëndë në rrethrrotullimin kryesor në Prishtinë ishin duke u kthyer nga një dasmë në rajon të Mitrovicës.

Sipas burimeve të portalit ‘arbresh.info’ dy viktimat meshkuj ishin kushërinj të dyfishtë ku po ktheheshin me gratë e tyre dhe një djalë  17 vjeçar, i cili ka mbijetuar.

Aksidenti ka ndodhur pas mesnate, saktësisht në ora 00:57 në rrethrrotullimin kryesor, magjistralja që lidh Mitrovicën me Prishtinën. Vetura ka qenë e tipit “Audi” me targa gjermane.

Zëdhënësi i Policisë Bajram Krasniqi e ka konfirmuar rastin për “arbesh.info” duke thënë se personat e vdekur janë të një familje nga komuna e Vitisë.

“Janë 4 persona që kanë humbur jetën, një është i lënduar. dy meshkuj janë të datëlindjes 1964, një femër 1967 dhe një tjetër 1970. Ndërsa në gjendje të rëndë është një mashkull i datëlindjes 2000. Të gjithë personat kanë një mbiemër”, tha Krasniqi./Arbresh.info