Koalicionet e mundshme për ndërtimin e qeverisë, dhe zgjedhja e presidentit janë dy temat kryesore aktuale në politikën kosovare.

Partia Demokratike e Kosovës e cila ka dalë parti e dytë në vend ka bërë të qartë se do të mbetet në opozitë.

Nënkryetari i PDK-së, Sami Lushtaku, ka thënë se ai personalisht është kundër një bashkëpunimi me partinë e Kurtit.

“Unë nuk kisha bo me Albin Kurtin, mendimi jem është ‘JO’ një herë me Albin Kurtin. Po foli për këtë mandat, çka ndodh tutje nuk e di”, ka thënë Lushtaku për Reporterin.

I pyetur nëse PDK ka vota për Vjosa Osmanin presidente, ai ka thënë shkurt “JO”.

Kurse për mundësinë që të votojnë Ramush Haradinajn për president, Lushtaku ka deklaruar “nuk e di”.

Më tej Lushtaku ka bërë të ditur se partia do të mblidhet pas ceritfikimit të rezultateve për të diskutuar të gjitha këto çështje.

Kujtojmë se kreu i Vetëvendosjes, Albin Kurti, vazhdimisht thotë se nuk do të bëjë koalicion qeverisës me ndonjë nga partitë politike shqiptare, pasi ka bërë koalicion parazgjedhor me Listën e Vjosa Osmanit.