Ministrja e Mjedisit dhe Planifikimit Hapësinor, Fitore Pacolli ka njoftuar se ka filluar procesi i trajtimit të dokumentacionit për gurthyesit që operojnë në vend, duke e cilësuar këtë si një hap të rëndësishëm drejt vendosjes së rendit dhe ligjshmërisë në këtë sektor.

Sipas saj, ky proces synon verifikimin e plotë të përmbushjes së kushteve ligjore dhe mjedisore nga ana e operatorëve, me qëllim garantimin e standardeve më të larta në funksionimin e tyre dhe mbrojtjen e mjedisit, si dhe të jetës së qytetarëve.

“Ka filluar procesi i trajtimit të dokumentacionit për gurthyesit që operojnë në vendin tonë, si një hap i rëndësishëm drejt vendosjes së rendit dhe ligjshmërisë në këtë sektor me ndikim të drejtpërdrejtë në mjedis dhe jetën e qytetarëve. Ky proces synon verifikimin e plotë të përmbushjes së kushteve ligjore dhe mjedisore nga ana e operatorëve, duke garantuar standarde më të larta në funksionim e tyre. Në këtë proces janë të përfshirë edhe përfaqësues të shoqërisë civile, të cilët po e monitorojnë nga afër çdo hap të tij”, ka shkruar Pacolli.