Presidentja e vendit, Vjosa Osmani ka pritur dje në takim Arbnor Spahiun, ish-pjesëtar i Njësisë Speciale të Policisë së Kosovës, i cili ishte arrestuar nga policia serbe në qershor të këtij viti.

Përmes një postimi në Facebook, Osmani tha se i ka uruar Arbnorit gjithë të mirat dhe rikthim sa më të lehtë në normalitet, shkruan Arbresh.info.

“Dje prita në takim ish-pjesëtarin e Njësisë Speciale të Policisë së Kosovës, Arbnor Spahiun, i cili është liruar nga paraburgimi në Serbi pas disa muajsh mbajtjeje peng. Arbnorit i urova gjithë të mirat pranë familjes së tij dhe një rikthim sa më të lehtë në normalitet”, tha Osmani.

LEXO EDHE:

Ish-polici Arbnor Spahiu lirohet nga burgu në Serbi

Tutje, presidentja u ka kërkuar bashkatdhetarëve që udhëtojnë drejtë vendit tonë për festat e fundvitit, të shmangin kalimin nëpër Serbi.

“Qytetarëve tanë që jetojnë jashtë Kosovës dhe që mund të udhëtojnë drejt vendit sidomos gjatë festave të fundvitit, u bëj thirrje të shmangin kalimin nëpër Serbi, pasi atje vazhdojnë të jenë në pushtet struktura që nuk dallojnë në mendësi nga regjimi i kaluar serb”, tha Osmani.

Kujtojmë se ish-polici Spahiu është liruar nga paraburgimi në Serbi me 21 nëntorë./Arbresh.info