Presidentja e Kosovës, Vjosa Osmani, kur është pyetur për Asociacionin e komunave me shumicë serbe, është përgjigjur në mënyrë indirekte se mbështet çdo iniciativë që nuk ka kompetenca ekzekutive.
Ajo ka deklaruar kështu në një intervistë me REL-in përgjatë qëndrimit të saj në Pragë, duke thënë se e mbështet asociacionin vetëm si OJQ.

“Unë mbështes çdo iniciativë që nuk është në kundërshtim me Kushtetutën e Republikës së Kosovës dhe komunave tashmë u lejohet që të bashkohen në asociacione multietnike, pa kompetenca ekzekutive, pra si OJQ”, deklaroi ajo.

“Partnerët ndërkombëtarë, natyrisht, që si parim të përgjithshëm e kanë që çfarëdo që është nënshkruar në Bruksel të zbatohet dhe ju e dini që në vitin 2013 është nënshkruar një marrëveshje, por në vitin 2015 ka pasur një marrëveshje dedikuar në mënyrë të veçantë Asociacionit të komunave serbe. Kjo marrëveshje është rrëzuar nga Gjykata Kushtetuese e Republikës së Kosovës dhe aty është e qartë që diku 23 nene të Kushtetutës sonë janë shkelur me atë që është dakorduar në Bruksel”, shtoi më tej e para e vendit.

“Ligji për vetëqeverisje lokale parasheh që komunat mund të bashkohen në OJQ për të shtyrë përpara, për të lobuar për interesa të caktuara, por pa kompetenca ekzekutive”, vijon më tej Osmani.