Të shtunën, disa operatorë kabllorë në Kosovë në programet sportive kanë transmetuar pamje kërcënuese që ndërlidhen me sulmin terrorist të 24 shtatorit në Banjskë të Zveçanit.

Ndaj kësaj, ka reaguar kryetari i Komisionit të Pavarur për Media (KPM), Jeton Mehmeti i cili ka thënë se mbrëmë është njoftuar për këtë rast, shkruan Arbresh.info

Lexo edhe:

Në kabllorët vendorë shfaqet spoti kërcënues në serbisht

Me anë të një postimi në Facebook, Mehmeti ka thënë se nesër do të analizohen gjetjet e këtyre shpërndarjeve, kurse të martën vendosin për rastin në mbledhjen e Komisionit.

“Mbrëmë jemi lajmëruar nga qytetarë të shumtë se disa nga operatorët e shpërndarjes që janë të licencuar nga KPM po transmetojnë në platformat e tyre video mesazhe kërcënuese për rendin dhe sigurinë kombëtare. Sot kemi filluar menjëherë me mbledhjen e provave. Nesër i analizojmë gjetjet kurse të martën vendosim për rastin në mbledhjen e Komisioni”, shkruan Mehmeti.

Kujtojmë se të shtunën, programet sportive serbe ‘Arena sport’ që transmetohen nga disa operatorë kabllorë në Kosovë, kanë transmetuar spote kërcënuese dhe lëvdata për sulmuesit terrorist serb që u vranë nga Policia e Kosovës në Banjskë të Zveçanit.

Pamjet tregojnë Manastirin e Banjskës dhe datën e 24 shtatorit, kur ndodhi sulmi terroristë./Arbresh.info