Spitali i Përgjithshëm në Pejë ka njoftuar për gjendjen e pacientëve pas aksidentit të rëndë të trafikut që ndodhi sot në fshatin Shushicë të Istogut.

Sipas njoftimit, rreth orës 16:00 në Shërbimin e Emergjencës është pranuar një paciente pa shenja jete, si pasojë e aksidentit. Pavarësisht procedurave të ndërmarra nga ekipet mjekësore, është konstatuar vdekja e saj, pasi kishte pësuar politraumë.

Rreth orës 16:30 janë pranuar edhe katër pacientë të tjerë të lënduar nga i njëjti aksident.

Një fëmijë është transferuar në Qendrën Klinike Universitare të Kosovës (QKUK), i intubuar dhe nën përcjelljen e ekipit të Anestezionit, për trajtim të mëtejmë. Sipas spitalit, fëmija ka pësuar politraumë, hemorragji intrakraniale dhe frakturë të femurit.

Një paciente tjetër është hospitalizuar në Repartin e Ortopedisë me frakturë të femurit, ndërsa dy pacientë pas ekzaminimeve dhe trajtimit mjekësor janë liruar për trajtim ambulantor, pasi kanë pësuar lëndime të lehta trupore.

Spitali i Përgjithshëm në Pejë ka shprehur ngushëllime për familjen e viktimës dhe ka uruar shërim të shpejtë për të lënduarit./Arbresh.info

LEXO EDHE:

Aksident i rëndë në Istog: Vdesin dy persona, tre të lënduar