Policia e Kosovës ka njoftuar se nga e mërkura (3 Prill) do të fillojë dërgimin e gjobave të trafikut në adresë të pronarit të automjetit për kundërvajtjet e identifikuara përmes kamerave dhe radarëve.

Me anë të një njofitmi në Facebook, policia ka treguar se gjobat do të dërgohen me postë apo edhe përmes platformës e-Kosova, shkruan Arbresh.info.

“ Çka duhet të dini? Pronari i automjetit do të pranojë gjobën në adresën e tij. Nëse ai nuk ishte drejtuesi i mjetit në momentin e shkeljes, është i detyruar të sigurojë të dhënat e shoferit. Mosdorëzimi i këtyre të dhënave sjell masa ligjore për personat fizik dhe juridik sipas nenit 254 të Ligjit nr. 08/L-186.”, thuhet në njoftim.

Policia ka bërë të ditur se do të ketë edhe lehtësira për qytetarët

“Përfitoni -50% zbritje në pagesë, nëse e paguani brenda afatit ligjor! Keni të drejtën e ankesës nëse nuk pajtoheni me gjobën.”, thuhet tutje.

“A keni shitur një automjet? Nëse nuk e keni më në pronësi një automjet, njoftoni autoritetet dhe transferoni pronësinë, për të shmangur gjobat dhe shqetësimet e panevojshme.”, njofton policia.
Tutje, policia bëri thirrje për respektim të rregullave të trafikut./Arbresh.info/