Ushtruesi i detyrës së kryeministrit, Albin Kurti, ka pritur në një takim ish-gazetarë, redaktorë dhe autorë librash të gazetës “Rilindja”, me rastin e 36-vjetorit të Deklaratës Kushtetuese të 2 Korrikut.

Sipas Kurtit, takimi u organizua për të kujtuar rolin e “Rilindjes” si gazetë dhe shtëpi botuese, si dhe për të diskutuar rëndësinë e raportimit dhe mbulimit të ngjarjeve historike.

Ai vlerësoi se gazeta “Rilindja”, me botimet e saj përgjatë katër dekadave e gjysmë, përbën një arkivë të çmuar të historiografisë së Kosovës.

“Gazeta e përditshme Rilindja me numrat e saj përgjatë katër dekadave e gjysmë janë arkivë e çmuar e historiografisë sonë. Bashkë me Universitetin e Prishtinës dhe Akademinë e Shkencave dhe të Arteve, ajo pati rol qendror në emancipimin shoqëror dhe kultivimin e shqipes së shkruar. Përtej informimit, botimet e saj ishin vetëdije profesionale e kombëtare dhe referencë që i mbijeton kohës”, ka shkruar Kurti.

Në takim morën pjesë Binak Kelmendi, Ibrahim Kadriu, Evliana Berani, Dush Gashi, Mehmet Gjata dhe Emine Berisha, ish-gazetarë, redaktorë dhe autorë librash të “Rilindjes”./Arbresh.info